ڤەکۆلینا من تەکەزێ ل سەر دەروونناسییا ئەرێنی، شیرەتکاریا دەروونی، و پێشئێخستنا ساخلەمیا دەروونی و باشبوونا دەروونی دکەت، ب شێوەیەکێ تایبەت گرنگیێ ب پێشڤەبرنا شیان و هێزێن دەروونی، بلندکرنا کارامەییێن خۆگونجاندنێ، و پالپشتیکرنا شیانێن تاک و جڤاکان بۆ گەشەیا ئەرێنی و خۆڕاگریێ ددەت.
پشکەکا سەرەکی یا ڤەکۆلینا من بریتییە ژ دیزاینکرن، پێشڤەبرن، و هەلسەنگاندنا بەرنامەیێن دەروونی و شیرەتکاریێ یێن ل سەر بنەمایێ بەلگەهان هاتینە ئاڤاکرن؛ ئەوێن ئارمانج ژێ پێشئێخستنا ساخلەمیا دەروونی، ب هێزکرنا کارامەییێن دەروونی، بلندکرنا ئاستێ خۆڕاگریێ و کارکرنا ئەرێنی، دیسان پشکداریکرن د رێگریکرن ل ئاریشە و نەساخیێن دەروونی دا.
هەروەسا، ئەز گرنگیێ ب ساخلەمیا دەروونی و پالپشتیا دەروونی-جڤاکی (MHPSS) د رەوشێن مرۆڤایەتی و دەڤەرێن زیاندیتی ژ ململانێ و شەڕان دا ددەم، ب تایبەتی د پێشڤەبرنا وان رێکێن دەستپێگەهشتی، رێگریکار، و جڤاک-بنیات دا، ئەوێن باشبوونا دەروونی و شیانێن خۆگونجاندنێ ب هێز دئێخن ل وان دەڤەرێن کو خزمەتگوزاریێن دەروونی یێن تایبەتمەند تێدا کێم یان سنووردار بن.
زێدەباری ڤێ چەندێ، ڤەکۆلینا من پێشڤەبرن و هەلسەنگاندنا ئامرازێن ڤەکۆلینێن دەروونی و پەروەردەیی بخۆڤەدگریت، دگەل هەلسەنگاندنا بەرنامەیێن شیرەتکاری و دەروونی-جڤاکی. ب ڕێکا ڤی کاری، ئەز بزاڤێ دکەم پشکداریێ د پێشڤەبرنا شیرەتکاریا دەروونی یا ل سەر بنەمایێ بەلگەهان و کارێن رێگریکار یێن ساخلەمیا دەروونی ل هەرێما کوردستانێ دا بکەم، ب ئاوایەکێ کو بجهئینانێن پراکتیکی بۆ تاکان، ناڤەندێن پەروەردەیی، و جڤاکی هەبن.

ئەز ژ ساڵا 2006ێ وەرە ب بەردەوامی ل ناڤەندێن خواندنا بلند وانەبێژیێ دکەم، دەستپێکا کاروانێ من یێ ئەکادیمی ل کۆلیژا پەروەردە، پشکا پەروەردە و دەروونناسیێ ل زانکۆیا دهۆک بوو. پاشان من ل زانکۆیا زاخۆ و کۆلیژا پەروەردا بنەڕەت وانە گۆتینە، بەری کو بەردەوامیێ بدەمە کارێ خۆ یێ ئەکادیمی ل پشکا شیرەتکاریا پەروەردەیی و دەروونی، ل کۆلیژا پەروەردە – زانکۆیا دهۆک.

ل درێژاهیا کاروانێ خۆ یێ ئەکادیمی، من کۆمەکا بەرفرەھ ژ بابەتێن قۆناغا بەرایی (بەکالۆریۆس) د سێ بوارێن سەرەکی دا گۆتینە: دەروونناسی، ژ وان ژی: دەروونناسییا گشتی، دەروونناسییا گەشەیێ، دەروونناسییا فسیۆلۆژی، و دەروونناسییا ئەزموونی؛ پەروەردە، ژ وان ژی: بنەمایێن پەروەردێ، فێرکرنا مەزنان، و فێرکرنا بەردەوام؛ دیسان ڤەکۆلین و هەلسەنگاندن، ژ وان ژی: رێبازێن ڤەکۆلینێ و پیڤان و هەلسەنگاندن. ئەرکێن نوکە یێن وانەگۆتنا من دەروونناسییا گشتی و ساخلەمیا دەروونی بخۆڤەدگرن.

رێبازا من یا وانەگۆتنێ فێرکرنا تیۆری دگەل راهێنانا پراکتیکی یا ڤەکۆلینێ گرێددەت، کو ئەڤ چەندە دەرفەتێ ددەتە قوتابیان شیانێن خۆ یێن دیزاینکرنا ڤەکۆلینان پێش بێخن، ئامرازێن هەلسەنگاندنێ هەلبسەنگینن، و ئەنجامێن ڤەکۆلینان ب شێوەیەکێ رەخنەگرانە شۆڤەکەن (شرۆڤە بکەن). ب ڕێکا ڤێ شێوازێ، ئارمانجا من ب هێزکرنا زانینا ئەکادیمی، هزرکرنا رەخنەگرانە، و کارامەیی و شارەزاییێن پیشەیی یێن قوتابیانە.

ئەزموونا من د سەرپەرشتیکرنێ دا ل سالا 2006ێ دەستپێکر؛ من سەرپەرشتیا پرۆژەیێن دەرچوونێ یێن قوتابیێن بەکالۆریۆسێ د بوارێن دەروونناسی، و هەروەسا ڕێنووینیا پەروەردەیی و دەروونیدا ل زانکۆیا دهۆک و زانکۆیا زاخۆ کریە. ڕێبەریکرنا من پالپشتیا قوتابیان دکەت د هەمی قۆناغێن خولا ژیانا ڤەکۆلینێ دا—ژ داڕشتنا پرسیارێن ڤەکۆلینێ و دەستنیشانکرنا میتۆدۆلۆژیێن گونجای هەتا دگەهیتە شیکارکرنا داتایان و پێشکێشکرنا دەستکەفت و ئەنجامان. ئەز بەردەوام تەرکیزێ دکەمە سەر هویربینی و تۆکمەییا میتۆدی، هزرا ڕەخنەگرانە، پێگیریا ب ئەخلاقێ زانستی، و کارێ ئەکادیمی یێ سەربەخۆ، دا کو شیانێن وان یێن ڤەکۆلینێ بهێز بێخین و پشکداریێن ب مفا پێشکێشی ڤی بواری بکەین.

ژ سالا 2015ێ وەرە، من هەروەسا وەک سەرپەرشتێ سەرەکی یێ ڤەکۆلینێن دکتۆرایێ د پشکا دەروونناسیا گشتی و تەندروستیا دەروونیدا ل زانکۆیا دهۆک کار کریە. سەرپەرشتیکرنا من بوارەکێ بەرفرەهـ ژ بابەتان بخۆڤە دگریت، ژ وان ژی: دەروونناسیا ئەرێنی، باشبوونا دەروونی، و ئاریشەیێن دەروونی. ب ڕێکا دانانا پێشینەیێ بۆ رەسەناتیا زانستی و ڤەکۆلینا هویربین و سەربەخۆ، ئارمانجا من ئەوە کو پەرەپێدانێ ب ڤەکۆلینێن دکتۆرایێ یێن ب کواڵێتیا بلند بدەم، ڕێبەریێ بۆ ڤەکۆلەرێن نوی و گەنج بکەم، و پشکداریێ د پێشڤەبرنا زانینێ دا د بوارێ دەروونناسی و ساخلەمیا دەروونیدا بکەم.

چالاکییێن من یێن ئەکادیمی و پیشەیی د درێژاهیا بوارێن خواندنا باڵا، خزمەتگوزاریێن دەروونی و جڤاکی، ڤەکۆلینێن مرۆڤایەتی، و گەشەپێدانا جڤاکی دانە؛ ب تەکەزکرنەکا تایبەت ل سەر ساخلەمیا دەروونی و پالپشتیا دەروونی-جڤاکی (MHPSS)، پاراستن (Protection)، و توندوتیژییا ل سەر بنەمایێ جێندەری (GBV).

ل سەر ئاستێ زانکۆیێ، من چەندین ساڵان وەک بڕیاردەرێ پشکا پەروەردە و دەروونناسیێ خزمەت کرییە، هەروەسا پشکداری د بڕێڤەبرنا ئەکادیمی دا کرییە ب ڕێکا ئەندامبوونێ د لژنەیێن زانستی، خواندنا باڵا، ئەزموونان، پرۆگرامێن خواندنێ، و لژنەیێن پلەبەرزکرنەوەیا زانستی دا. دیسان من پشکداری د لژنەیێن گەنگەشەکرنا نامەیێن ماستەرێ و تێزێن دکتۆرایێ دا ل زانکۆیێن دهۆک، زاخۆ، سەڵاحەدین–هەولێر، و مووسڵ کرییە، دگەل هەلسەنگاندنا پێداچوونەوەیا زانستی بۆ ڤەکۆلینێن کۆڤارێن ئەکادیمی یێن باوەرپێکری.

ل سەر ئاستێ نێڤدەوڵەتی، من وەک شارەزایەکێ نێڤدەوڵەتی ل دەستەیا نەتەوەیێن ئێکگرتی بۆ ژنان (UN Women) ل یەمەنێ (2021–2022) کار کرییە، دیسان وەک ڤەکۆلەر، کۆمکەرێ داتایان و راهێنەر د پرۆژەیەکێ ب پالپشتیا ئاژانسا گەشەپێدانا نێڤدەوڵەتی یا ئەمریکی (USAID) ل دەشتا نەینەوا (2022–2024). هەروەسا وەک ڤەکۆلەر پشکدار بوویمە د پرۆژێ زانکۆیا کۆڤێنتری (Coventry University) دەربارەی ڤەگەڕیایێن شنگالێ و کەمپێن دهۆکێ (2023–2024). دناڤبەرا ساڵێن 2014 و 2018ێ دا، من هەڤکاری دگەل چەندین رێکخراوان کرییە، ژ وان: GIZ، لژنەیا نێڤدەوڵەتی یا فریاکەوتنێ (IRC)، Christian Aid، هاریکاریا کەنیسەیا نەرویجی (Norwegian Church Aid)، Tearfund، و هاریکاریا کەنیسەیا سویدی (Swedish Church Relief)، و من بەرپرسیارەتی د بیاڤێن هەلسەنگاندنا پرۆژەیان، هەلسەنگاندنا پێدڤییان، راهێنانا پیشەیی، و پاراستنا زارۆکان دا وەرگرتینە.

من رێکخراوا نۆرێل یا گەشەپێدانێ (NOREL) دامەزراندیە و بڕێڤەبریە (2015–2019)، و ژ ساڵا 2007ێ وەرە وەک راهێنەر و شاوێرمەندێ دەروونی دگەل رێڤەبەرایەتییا بەرەنگاربوونا توندوتیژییا دژی ئافرەتان و سەنتەرێ شێوەرمەندیا خێزانی یێ سەر ب وێڤە کار دکەم. چالاکییێن من یێن راهێنانا پیشەیی ڤان بواران بخۆڤەدگرن: فریاگوزارییا دەروونی یا سەرەتایی (PFA)، شیرەتکاریا دەروونی و بڕێڤەبرنا کەیسان، پالپشتیا ئاگادار ژ زەبرێن دەروونی (trauma-informed support)، پاراستن و سەلامەتی (safeguarding)، و پەروەردا هەستیار ب جێندەری.

ئەڤ چالاکییە رەنگڤەدانا پێگری و پابەندبوونا منن ب باڵادەستییا ئەکادیمی، هەڤکاریا دناڤبەرا پسپۆریێن جودا دا، ئاڤاکرنا شیانێن پیشەیی، و پێشئێخستنا ساخلەمیا دەروونی و پاراستنێ دناڤ جڤاکێن لاواز و زیاندیتی دا.

لا توجد سيرة ذاتية